真普聯函湯家驊促支持

【明報專訊】公民黨立法會議員湯家驊去年10月以個人名義，提出「排序複選制」特首普選方案，獲黨友郭榮鏗，同埋公專聯立法會議員莫乃光及梁繼昌支持，湯家驊近日好積極落區宣傳，噚日傍晚仲拉埋城大公共政策學系助理系主任葉健民去紅磡，宣傳「湯家驊方案」。而差唔多喺同一時間，真普聯噚晚喺立法會就決定去信湯家驊等4名議員，要求佢全力推真普聯方案。


湯家驊：冇權警告我

人民力量劉嘉鴻話，人力暫時不會參加真普聯宣傳，直至4人有回應，佢哋仲唔排除會趁湯家驊宣傳期間，另行搭台宣傳真普聯三軌方案，落區「提醒」湯家驊要做應該做嘅事喎。而湯家驊就同Emily講，佢推動緊嘅係真普聯三軌方案中嘅提名委員會方案，真普聯冇權警告佢，形容人民力量搞事嘅做法係幼稚。


學民游說議員撐辭職「公投」

另一邊廂，學民思潮噚日就搵咗黃毓民游說對方支持議員辭職變相「公投」。學民思潮黎汶洛話，已經見咗大部分泛民議員，大部分議員對辭職「公投」反應正面，不過最終係咪會落水參加就另當別論，而不同政黨對辭職啟動「公投」嘅時間亦意見不一，佢哋計劃喺4至5月，搵埋有意參與辭職「公投」嘅政黨籌組委員會再作策略性研究。