政協人代「做功課」 記者約訪添難度

【明報專訊】人大會議昨晨正式開幕，全國以至各地記者雲集北京人民大會堂採訪，聽李克強總理讀工作報告之餘，亦會搵人大代表以至列席嘅政協委員做訪問，但今年採訪嘅機會就少咗，Emily喺會堂走廊諗住搵人傾偈，就鮮見佢哋蹤影，原來大部分人乖乖留喺會議廳睇報告。細問之下，原來一早有人「提點」佢哋，開會要認真，唔應該去大會堂參觀或吹水。


繼續節約 清茶或水

今年人大及政協兩會繼續奉行簡約節儉，會場內只係提供簡單清茶或開水。而大會亦早早提醒各省市，包括香港嘅代表，要減少應酬、生活簡約，所以內地部門都少咗搞宴請港區代表嘅活動。不過，香港嘅政黨及社團仍然有搞宴會聯誼，好似民建聯噚晚便設宴請港區代表，仲有好多猛人出席，除咗特首梁振英之外，仲有全國人大法律工作委員會主任委員喬曉陽、中聯辦主任張曉明等。