李小加談阿里：你懂的

【明報專訊】全國政協發言人呂新華日前一句「你懂的」，紅遍全國，今日連港交所（0388）行政總裁李小加都忍唔住引用，至於李小加講緊咩嘢要出動呢句潮語？你懂的。無錯喇，咪就係講阿里巴巴囉！港交所想就容許不同股權架構展開諮詢，但近日有報道話，證監會有保留，可能無咁快可以諮詢。噚日有記者問小加點睇，佢最初都唔肯評論，但作為阿里巴巴嘅忠實粉絲，佢最後都忍唔住發表意見。


佢就話，唔希望有一兩個人說不就無咗件事，如果展開諮詢，可以集思廣益，無論結果係點，都起碼經歷過諮詢，而唔係一開始就否定。佢本來用英文講，講到最後忍唔住轉番普通話，講咗句「你懂的」。


呢句說話係呂新華被問到有關周永康傳聞時嘅回應，小加學嘢真係學得快，其實早前小加喺網誌已經講得好清楚，一句到尾，小加就係唔甘心，你懂唔懂？反正小琴懂了。


[小琴密語]