罕有開腔小超﹕唔好令我後悔講嘢

【明報專訊】全國政協常委、長實副主席李澤鉅（小超）向來都較嚴肅，過去喺北京開兩會，都唔輕易接受記者訪問，但噚日佢就似乎心情唔錯，一早準備去開會時，雖然唔評論記者問佢有關APEC財長會議唔喺香港舉行、長遠財政報告等問題，但都笑笑口咁話「家無嘢講」，又話下晝個會重要啲（即全國人大委員長張德江見港澳政協委員）。有記者問佢點樣應對北京空氣差，李澤鉅笑言都唔使準備啲咩，因為佢大部分時間留喺室內。


中聯辦副主任殷曉靜喺政協小組會上呼籲大家多就政改發聲，罕有評論政治問題嘅李澤鉅亦立即響應呼籲，會後企定定咁同記者講佢對佔領中環嘅睇法（刊A6）。難得小超開口，記者都希望佢多講幾句，乘機追問佢對政改等睇法，小超就話自己要講嘅已講完，仲同記者講﹕「唔好令我後悔同你哋講嘢」，嘩！講到咁，大家唯有鳴金收兵，目送佢同保鑣一齊離開。