港政協出席率低被提示

【明報專訊】港區全國政協委員有200幾人，好多都係有頭有面嘅忙人，但係上到北京開兩會，就難逃被「提醒」喇。本身係全國政協常委嘅中聯辦副主任殷曉靜，噚日出席政協小組會議時，特別提醒一眾政協盡量出席所有會議，又話過去港區政協出席率偏低，希望佢哋做好安排。


田北俊、林健鋒、譚耀宗等都證實，殷曉靜喺會上提醒佢哋要多開會，據講對方特別指出，澳門人代、政協，港區人代嘅出席率都OK，但係港區政協就比較差喇，好似早前喺珠海召開預備會議，中央特別邀請咗財政部長嚟講嘢，但最終只得50幾人出席。雖然已有溫馨提示，但似乎都有唔少人喺兩會期間要請假，好似工聯會陳婉嫻就要返香港主持立法會福利事務委員會會議。


至於宴請問題，殷曉靜提到今年新安排下無咩特別宴會，但「一國兩制」下港區小組會有特別安排，包括領導人會有一餐飯邀請。據悉，會上亦有人提及叫班委員開會出去食飯都唔好咁大班人，亦唔好掛住政協名牌周圍走，但究竟係咪驚恐怖襲擊等，定係其他原因呢，就不得而知。