后海灣黑臉琵鷺少三成

【明報專訊】香港觀鳥會噚日公布瀕危鳥類黑臉琵鷺嘅普查數字，雖然東亞地區整體數字創新高，達2726隻，但係后海灣嘅黑臉琵鷺數量就連續4年下跌，今年更急跌近三成，由上年嘅351隻跌到得番252隻，情况令人擔憂。


東亞數字創新高 多咗一隻

觀鳥會自2003年起，每年都做一次普查，今年普查就喺1月中做，總共動用咗250名義工，喺東亞各地，由韓國到泰國等7個國家，及中國沿海多個地區，共發現2726隻黑臉琵鷺，較去年多咗1隻，但已創下有紀錄以來新高。


不過，橫跨香港及深圳嘅后海灣，黑臉琵鷺數字自2010年起已連跌4年，今年跌幅達三成。觀鳥會話未知原因，而跌幅達61%嘅福建福清，就相信係因為附近工業區發展而令數量下跌。澳門就因為建立保育區，令數量較去年增25%，達60隻。


雖然整體數字創新高，觀鳥會研究經理余日東未感興奮，因為實質升幅緩慢，對於仍處瀕危狀態嘅物種而言，情况嚴峻。