數名政協遲到送車尾

【明報專訊】全國政協大會噚日正式召開，會議喺下午3點舉行，而香港區嘅政協委員就獲知會要準時2點20分，一齊喺下榻嘅貴賓樓酒店大門外集合，搭指定小巴直驅往人民大會堂。不過，第一天會議前便出現極尷尬場面，有數名屬富豪級嘅委員，因為遲到幾乎去唔到開會，其中蔡冠深匆匆跑到大堂時，見到10多部小巴準備開車，即刻衝前，逐架拍打車門請求畀佢上車，情况就好似我哋喺巴士站追巴士，但就無人肯開門畀佢上車！咁都未夠尷尬，有個職員仲大聲教訓﹕「說過1分鐘也不等！」


蔡冠深拍車門無人理

蔡冠深係新華集團主席，咁樣吃咗一記悶棍，無奈苦笑。Emily望過自己手表，見蔡喺2點20分至21分已到達，咁算唔算遲呢，可能大家要對吓表先得喇。後來蔡冠深都有車接佢走。


另外，最少有兩個老闆級政協遲到，分別係信義玻璃主席李賢義，同埋福建社團聯會嘅林樹哲，佢哋兩點半前來到大堂，發覺人影不見，一臉茫然，佢哋解釋係搞錯時間，以為兩點半先出車！不過，職員最後都有照顧佢哋，安排佢哋同職員等人一齊坐私家車趕去會場。


李賢義林樹哲話搞錯時間

噚日北京空氣開始轉差，戶外行動就要留意，好似自由黨周梁淑怡，出外時就準備好口罩，雖然唔係N95，但好過無。


全國政協外事委員會副主任盧文端就醒喇，向朋友借用空氣清新機放喺房間，可以除菌、過濾及保濕，啱晒北京天氣用。