兩會節約 珠姐自己推行李

【明報專訊】今年人大兩會繼續奉行節約、簡便，宴會繼續減少，盡量亦要少送禮。有政協成員就話，中央提醒大家，應該要塞住大飲大食嘅口，口要用來講國家大事嘅問題。港區人代珠姐譚惠珠亦話，以往佢嚟到北京，喺機場禁區內已經會有人員幫佢拎行李接待，但今年自己動手，行到去客運樓門口，先至有攞住北京飯店紙牌嘅接待人員幫手。


早已提醒新人做功課

港區人代上年亦係換屆年，身為資深港區人代嘅珠姐話，早已經提醒12名新人要做足功課，10月起已經要睇人大常委會報告，留意中央動態發展做功課，希望上京開會，唔會浪費10分鐘嘅發言時間。


每年人大兩會都會有唔少「風頭躉」，好似前廉政專員湯顯明，噚日喺北京自然成為追訪對象。珠姐噚日談及港區人代嘅討論議題時，話除咗教育、旅遊外，「反貪」一定有人講，有記者即刻問珠姐，會唔會講湯顯明嘅問題，珠姐就話，港區人代講嘅，唔會只係聚焦於香港，應該唔會講湯顯明個人，人大講嘅係全個國家嘅問題。