新組織成立 統一青年團體

【明報專訊】香港青年組織近年愈生愈多，例如香港青年聯會同菁英會咁，政界一直有傳，一直各有各做嘅建制青年團體，有意籌備一個統一嘅青年組織。Emily早前同菁英會創會主席施榮忻（Jaime）傾開偈，終於聽到啲眉目，新組織叫做「香港各界青少年活動委員會」，估計第一屆會由青聯前主席陳仲尼做主席，Jaime自己都會加入，但佢強調搞新組織唔係為政改造勢。


聽講，籌備工作已七七八八，新組織秘書處仍會設喺青聯，有9個青年團體都會加入，包括青聯、菁英會等。Jaime透露，博鰲論壇今年向各個國家及地區各邀請一名「青年觀察家」參與會議，仲會邀請20個義工到博鰲幫手，佢哋有機會見到國家領導人。博鰲會安排酒店食宿，菁英會就會出機票錢，換言之，義工學生一毫子都唔使畀。


Jaime話同梁振英（CY）講過，CY都好支持香港學生出外睇多啲。但揀選學生較敏感，菁英會只為大學收申請，再由博鰲挑選。聽講科大最少已有10幾個學生報名。