林大輝校慶 請CY見證

【明報專訊】工業界議員林大輝喺特首選舉時曾被視為「唐營」大將，但林大輝中學噚日舉行學校活動，就請來特首梁振英（CY）做主禮嘉賓。大輝被問到兩人係咪破冰，佢就話支持教育發展，培育下一代係不分陣營，不分黨派，更唔應該牽涉政治，有機會、有平台，就大家應該盡一分力喎！


大輝喺立法會一向對CY唔多客氣，喺免費電視發牌一役、《特權法》辯論，更曾經勸CY「收起你嘅高傲，聆聽市民訴求」。但係政治一日都嫌長，CY應邀出席林大輝中學10周年校慶開幕禮，仲參加放置時間囊儀式。佢喺典禮上話，希望10年後重臨校園，見證林大輝中學嘅發展。


大輝回應繼續盡顯「大師」本色，話到時一定會邀請「當時嘅特首」出席20周年校慶。不過，其實10年CY一定已經落任啦。