曹仁超盼兩女大器晚成

【明報專訊】有「平民股神」之稱嘅曹仁超，自從舊年接受胃癌手術之後少有露面，67歲嘅佢早排接受親子月刊訪問，唔講股票但大談教育之道，話自己絕對唔同意要仔女「贏在起跑線」，相反想兩個女「大器晚成」，因為希望佢哋有時間發展一門「發燒」嘅興趣，同埋靠呢門興趣賺錢，仲話如果要一世對住唔喜歡嘅行業，等於係落地獄之門！

有時間發展「發燒」興趣

親子月刊《樂活．家》最近訪問曹仁超，佢雖然話選擇職業唔應該以搵錢為出發點，但佢教導兩位千金就成日出動「利誘法」，細個成績好就會獎勵兩蚊，大學考到榮譽學位更「升呢」獎1萬，佢話咁唔代表「講金唔講心」，目的係透過獎勵，引發阿女嘅學習動機啫。曹仁超大女家喺上海做建築師，細女自細鍾意玩石頭，現時咪幫政府管理斜坡囉。