何俊仁爆老婆唔多睬

【明報專訊】財爺曾俊華噚日再去立法會向議員簡介預算案，民建聯陳鑑林就建議財爺下次喺預算案減派糖「減甜」嘅同時，不如加鹽，加番啲鹹味，費事預算案太悶，搞到有議員寧睇性感女郎照，都唔聽財爺讀預算案，明窒前日「分咗心」睇女模泳照嘅民主黨何俊仁。財爺當然知乜事啦，話自己睇報紙時，見到唔少議員聽佢份預算案聽到瞓晒覺，都覺得有啲唔好意思。


昨有官司未赴立會

噚日議會內外都對何俊仁事件議論紛紛，不過事件主角嘅何俊仁早上就無喺立法會出現，令大家更關心何俊仁返屋企後係咪畀家法侍候。Emily打電話畀何俊仁問個究竟，佢話老婆有少少唔係太睬佢，而佢噚日早上因律師樓有單官司要趕deadline，所以先無去到立法會。


何秀蘭：傾偈會先講「我望過嚟啦」

平日立法會大會，工黨何秀蘭（Cyd）坐喺何俊仁左手邊，Emily問阿Cyd對呢件事有咩睇法，阿Cyd笑笑口咁話，下次開會時有咩要同何俊仁講，都會先講句「我望過嚟啦」，畀3秒準備時間佢。


黨友黃碧雲就話，當日聽財政預算案時，試過擰轉頭同何俊仁講嘢，但佢形容何俊仁嗰吓個樣「有啲嚇咗嚇」，但就唔知何俊仁嗰時睇緊乜嘢。


新民黨田北辰形容事件有點尷尬，提醒大家「私人嘢、敏感嘢就去第二度睇」啦。