捍衛網媒 本土新聞關注組成立

【明報專訊】近日正值本港傳媒界多事之秋，為咗捍衛新聞自由，「香港本土」兩個成員，公民黨毛孟靜（Miss Mo）同新民主同盟范國威成立咗「香港本土新聞關注組」，目的係希望將捍衛新聞自由嘅光譜擴闊到網絡媒體。Miss Mo話會主動留意網上媒體嘅新聞自由有否被打壓，亦會跟進有關投訴。Miss Mo話日前透過網上媒體跟進明報前總編輯劉進圖遇襲一事，又可以即時用App製作海報，令佢感受到網上媒體嘅威力，更有意要捍衛「第五權」。


Miss Mo：要捍衛「第五權」

另外，「香港本土」原本於星期日喺政府總部舉辦「港人港嘢」集會，捍衛廣東話，反對普教中，不過因應劉進圖遇襲一事，Miss Mo話會加入守衛新聞同言論自由嘅元素。當日傳媒界有意發起遊行，Miss Mo就話歡迎遊行隊一齊使用政總廣場。