預算案睇模照 何俊仁認錯

【明報專訊】財政預算案被指「無驚喜」，唔知係咪咁，民主黨立法會議員何俊仁噚日就喺財爺曾俊華宣讀預算案時，喺會議廳用iPad睇女模特兒性感泳裝照，有攝影記者話見到佢大大話話睇咗幾分鐘，有關新聞圖片已喺網上瘋傳。其後，仁哥承認「自己會議上分咗心」，唔應該喺開會時做同立法會無關嘅事，畀人不認真嘅感覺。


有網民就話，懷疑相中人係客串過《步步驚心》同《讓子彈飛》嘅北京電影學院校花于欣萌。仁哥有啲尷尬話「非常抱歉，大家都知我好少咁樣，可能因為近排有啲太攰，做咗啲唔應該做嘅嘢，我就呢樣係要致歉」，並承諾以後唔會咁。佢又形容事件令自己「非常尷尬」，「我係有誠意致歉，就算幾攰都應集中精神睇番同議會有關嘅嘢」，形容事件好不幸。


誠意致歉 「幾攰都應睇番議會嘢」

記者問佢平時有無睇啲類似嘅相，仁哥話「乜嘢都會有睇，我唔會話完全無睇，不過今日呢個場合就唔應該咁睇」。佢唔認同啲相係「鹹相」，「我諗好多你哋都睇到，都係少女啲相，喺啲網站嘅album度嚟，咁好多我相信可能係一啲模特兒嘅相，唔係一啲色情嘅相」。


立法會主席曾鈺成笑住拒評事件，而民建聯葉國謙被問到會否觀看類似相片時，就話「肯定唔會喺立法會會議上睇」，阿謙本身係議員個人利益監察委員會主席，佢話呢件事睇起上嚟，同議員個人利益無乜關係，亦未有人投訴，至於會否損害立法會聲譽，就因人而異，現時佢睇唔到有問題。


葉國謙：肯定唔會喺立會睇

民主黨主席劉慧卿話覺得仁哥咁做好唔恰當，已提醒有公職嘅黨員，要認真做嘢，但暫時未有人向佢提出黨內要有進一步行動同懲處。


世事就係咁蹺，英國《每日郵報》噚日報道，西班牙71歲議員雷維利亞早前喺一個地區會議上，被指開會時睇雜誌裸女照片。佢事後解釋正喺雜誌搵一篇文章。