囚犯製警靴40工序

【明報專訊】早前Emily睇新聞，見到有交通部男警員開工時，因為警靴「甩底」搞到拗柴受傷。其實，現時由監獄囚犯製作，負責安排犯人製鞋嘅懲教署，噚日安排傳媒參觀赤柱造鞋工場，了解囚犯製鞋工序。原來，一般囚犯經過兩至三個月訓練後，就可以喺獄中製鞋，製成品主要供警隊及懲教人員著。現時有80名囚犯負責製作防水透氣皮鞋，日產140對，製作工序40個，製成品會做2.94公斤嘅拉力測試。


懲教署：唔排除追究供應商

至於點解阿sir隻鞋會爛，懲教署初步睇過相片，相信係從供應商購入嘅鞋底物料接合有關，唔排除會向供應商追究咁話。懲教署工業及職業訓練組監督文家傑話，雖然暫時未回收番隻爛鞋，但係根據傳媒嘅相片所見，估計爆開嘅位置，係鞋底夾層嘅橡膠同輕膠接合位置，因此會向提供此組件供應商跟進。佢話，若發現係大問題，會研究向警方回收涉事同一批次嘅皮鞋。