中大GBS畢業生睇報紙「湊客」

【明報專訊】中大環球商業學（GBS）課程係唔少學生夢寐以求嘅課程，學生可以去美國同哥本哈根交流，認識各地嘅生活、工作文化等。呢個課程，唔單止傳授商科知識，仲會每個學期最少有4個工作坊，學生要學習餐桌禮儀等，務求令佢哋中英美法俄菜式都要「識食」。


今年25歲嘅石臻善（Junes）係GBS畢業生，畢業後加入匯豐做管理培訓生（MT），短短4年就升做匯豐（環球銀行）顧客業務香港區副總裁。Junes話，做banker不止要識投資，每日返工前要刨晒成份報紙，港聞、國際、財經等都睇，「因為我啲客多數係公司客，一間企業會橫跨幾個行業，政治事件都可能影響到佢哋業務」。為咗「湊客」，Junes仲要「全人發展」，佢本身識鋼琴、小提琴、跳舞、羽毛球、乒乓球等，家學緊打golf、品酒同睇波，「因為要接觸嘅人真係好多，每個人嘅興趣同經歷都唔同，要傾到偈，就要咩都識啲」。