馮煒光化名寫文？

【明報專訊】新聞統籌專員馮煒光被指以筆名「金鍾仁」喺報章撰文，文章內容包括抨擊自由黨反對遏抑樓市「雙辣招」咁話。自由黨黨魁田北俊同Emily講，自由黨嘅同事、公關都幫手問過「金鍾仁」嘅身分，究竟係唔係馮煒光，田少話「聽咗咁多人畀我嘅信息，我話係」，仲話「政府官員應該堂堂正正」，「做打手，就唔應該啦」。政府發言人話，馮煒光對揣測性嘅傳聞不作評論。


田少：我話係 馮煒光：不評論

政府發言人話，問責官員或公務員，不時會透過媒體解釋政府政策同闡述政府立場，目的係畀市民了解政策背後嘅理念，爭取支持。喺解釋同說明政府政策時，官員會以公職身分作出闡述。


田少就對政府官員用筆名寫文章好不以為然，話若果官員寫文，就應該堂堂正正，「政府官員係用納稅人嘅錢，有番咁上下人工，推銷政府政策係應該」。不過，田少就唔肯評論，究竟寫文係特首梁振英嘅意思，定有人揣測特首嘅意思去寫。


田少話，只望唔好再發生呢啲事件，至於「金鍾仁」嘅文章會唔會進一步影響自由黨同政府嘅關係，田少就話會以事論事去處理問題。