國際廚藝學院招生

【明報專訊】特首梁振英喺之前嘅施政報告內，分享咗香港廚師隊勇奪國際西餐廚藝大賽全場總冠軍嘅故事，同大家講行行出狀元；而職業訓練局亦即將成立國際厨藝學院，2014/15年度開始收生，希望更多年輕人入行，為本地西廚行業增添新動力、新元素，繼續為港爭光。


大賽冠軍：香港勤快本色致勝

香港代表隊去年奪得「世界廚藝大師大賽」同「國際青年廚師挑戰賽」總冠軍。其中3名得獎廚師接受政府新聞網訪問講致勝之道，佢哋話「正是香港本色嘅勤快同團隊精神」，令佢哋可以勝出。


當時佢哋設計咗紅菜頭三文魚伴蘋果沙律、牡丹蝦牛油果凍批、焗蟹餅配海鮮濃汁，代表香港參加「世界廚藝大師大賽」2013賽事嘅第一道菜。有份參賽嘅西餐廚師徐偉森同謝楠榕話，試咗多種食材，覺得牡丹蝦最能配合牛油果嘅味道；紅菜頭用作醃製三文魚後，剩餘部分可用忌廉打泡作伴菜。為預備比賽，當時港隊每星期收工後都通宵開會，研究食材配搭，為3道菜絞盡腦汁。