CY遇唐唐零交流

【明報專訊】特首梁振英同全國政協常委唐英年噚日一齊喺四季酒店出席友好協進會新春午餐會，近排因為商台前「名嘴」李慧玲被炒，兩人喺特首選舉對壘時嘅恩恩怨怨，又畀人拎番出嚟講。CY噚日同唐唐碰頭時，雙方「零交流」，反而CY同城中首富、長實集團主席李嘉誠嘅大仔李澤鉅就有傾兩句，CY亦有同全國人大常委范徐麗泰握手。


梁無食飯 僅留10分鐘

雖然畀面到場，但CY並無留低食飯，同一班外國領事傾咗大約10分鐘就走。唐唐就留低食足全程，坐喺佢對面係政制及內地事務局長譚志源以及李澤鉅。至於范太就坐喺唐唐右面，相信比CY有更充足時間交流。


獲邀演講 張曉明要上京缺席

據了解，友好協進會噚日原本邀請咗中聯辦主任張曉明演講，所以呢個午餐會原本係叫「演講會」，但因為張曉明有事要飛番北京，活動亦變成午餐會，改由中聯辦副主任殷曉靜出席。