《環時》鬧細佬 田北俊驚訝

【明報專訊】周日尖沙嘴「驅蝗行動」餘波未了，內地官方媒體《環球時報》繼引述學者批評「驅蝗」令香港言論自由顯得「不高貴」後，噚日燒埋身兼全國人大代表嘅新民黨立法會議員田北辰，批評佢將喺兩會提案限制內地自由行來港人數增長，係「很自私的動議」，唔少政界中人聽完都打咗個突，而自由黨黨魁田北俊雖然不盡認同細佬嘅建議，但都話唔知點解今次《環時》要咁大反應。


不過田大少話，細佬轉咗去新民黨，每個黨嘅做事方式唔同，佢認為，喺自由市場唔需要樣樣設上限，如果當地客量飽和，旅客會自動走位，就好似巴黎酒店滿咗咪轉飛羅馬囉，又例如若嫌美國過關安檢太麻煩，大可轉去加拿大，所以佢最近滑雪都轉咗去加國，半個鐘就入到境。大少「機動性」之高，真係唔係人人都做到。