一哥變「長城好漢」

【明報專訊】「一哥」曾偉雄（左）噚日出席警察隊員佐級協會新春酒會時，同Emily講起自己好鍾意行山，仲透露試過有一次訪京，深知「不到長城非好漢」，周末有空檔就帶埋同事行長城。一哥話，去到唔係睇吓風景就走，而係行完一個烽火台再去另一個烽火台，行咗4個鐘，連晏都無食，去到無路可行先至停。一哥仲同在場記者講，叫大家買定行山鞋，退休後約定Emily同行家行山咁話。


曾想退休住英國

講開退休，一哥想當年講起1990年代借調倫敦做偵緝警司，好鍾意嗰度嘅文化氣息，嗰陣仲同屋企人講，話想退休過英國住吓。但近年英國治安差咗，一哥就打消咗呢個念頭喇。由長城講到英國，一哥仲講埋近日有研究宗教同哲學，不斷探索人生意義，唔知係咪Emily同一眾行家太年輕，一時間摸不着頭腦，搭唔上嘴。右為警察隊員佐級協會創會會長譚惠珠。