土木署借史尋人

【明報專訊】好多人話香港係福地，無乜天災，其實香港山多地少，落起豪雨或遇到極端天氣，就會有山泥傾瀉風險。土木工程拓展署噚日就推出名為《山崩土淹》嘅電子書，講吓本港山泥傾瀉歷史，又展開「相中的你我他」活動，徵集書中有關山泥傾瀉嘅人物同故事嘅更多資料。土力工程處處長汪學寧希望，電子書及相關活動與大家重溫歷史之餘，亦要居安思危，保持對山泥傾瀉風險嘅警覺。


年輕一輩或者未必知道，香港早年有多次山泥傾瀉災難，好似1972年6月底喺秀茂坪臨時安置區，就有71人慘遭數以百噸山泥活埋；當晚港島半山再有大型山泥傾瀉，令干德道同旭龢道兩幢樓被摧毁，67人死亡。


市民可用平板電腦喺Android或iOS平台搜尋「山崩土淹」免費應用程式，下載電子書。至於「相中的你我他」尋人、尋故事活動，就可以喺5月31日前，透過電子書連結提供書中人物或故事資料，豐富日後修訂版內容。