梁美芬遲到 曾鈺成「訓話」

【明報專訊】立法會正馬拉松式審議買家印花稅（BSD）修訂條例草案，各議員都可自由發言，不過，噚日經民聯梁美芬就被主席曾鈺成「訓話」，話梁美芬發言內容同主題無關，仲暗批梁美芬開會唔應該遲到，搞到美芬好尷尬。


傾修訂講兩分鐘BSD

朝早大家討論緊印花稅第5、9、12條嘅條文同有關修正案時，梁美芬要求發言，用咗兩分幾鐘開場白講自己對BSD嘅意見，講講吓就被主席殺佢一個措手不及，曾主席叫佢快啲入正題，點知梁美芬駁嘴話「因為我係第一次就呢個議題發言，所以想講吓一點想法」。梁嘅說法看似有理，但主席就面露不悅，話呢啲評論「應該喺二讀辯論中發表」。兩人就開始疊聲對話，梁美芬話「唔好意思，今日趕唔切」，「今日我一返到嚟就已經投票咁滯」。


當梁美芬發言完畢，主席即刻提醒大家要注意發言內容，仲話「開會前十分鐘，秘書處已經通過廣播系統提醒大家依時出席，我都問咗有無議員要發言，留咗足夠時間，先請官員發言答辯」、「任何議員只要準時出席會議，一定唔會錯過喺二讀發言嘅機會」。雖然主席無點名，不過唔知有心定無意，大會個鏡頭不斷影住梁美芬，梁美芬只好尷尬地笑同不斷低頭睇文件。