招商局送神器太陽能電筒

【明報專訊】大家應該記得周星馳部電影國產凌凌漆入面，「集合十大武器功能於一身」嘅「攞你命三千」，除此之外仲有一支「有光就着，無光就絕對唔會着」嘅太陽能電筒。勢估唔到，響噚日隻光伏股聯合光伏（0686）嘅記者會上，公司大股東、招商局集團旗下招商新能源竟然送出集合呢兩大神器精髓於一身嘅產品做禮物（圖）。


可當收音機警報器用

首先，呢份禮物唔止係用太陽能發電嘅電筒，仲係收音機、警報器同埋手機充電器，集合功能之豐富媲美「攞你命三千」；其次，進一步改良太陽能電筒「有光就着，無光就唔着」嘅特色，有光固然會着，無光的話，只要大家不停轉動電筒旁邊手柄，手動叉電，就算無光，電筒都會着。


根據說明書，只要你每分鐘轉動手柄120個圈就可以叉電，手動叉電1分鐘就可以令電筒持續有光10分鐘，咁手動幫部電話叉電，咪直頭可以當佢係健身器材？！

email: piano@mingpao.com

[小琴密語]