馮煒光fb批「驅蝗」

【明報專訊】繼喺記者facebook點評被炒李慧玲嘅記者會「無物（乜）料」後，新聞統籌專員（IC）馮煒光喺自己個facebook「點評時政」，今次專員嘅焦點係「驅蝗」示威，佢以「歷史系博士研究生」身分「我手寫我心」，批評廣東道事件「影響香港好客之都美譽、打爛旅遊從業人員飯碗，破壞社會安寧、傷害兩地人民感情」。


馮專員話，有記者問佢點解以往有兩批示威遊行人士互相指罵，政府唔譴責，今次就咁高調呢。佢批評「驅蝗」示威影響香港好客之都美譽，又指「英國人撤出殖民地前後，總有人刻意挑族群矛盾，令前殖民地不得安寧。大家不可不察」。


「我條line無離開政府條line」

早前一日內有4個官員回應「驅蝗」示威，特首梁振英日前亦再批評示威者，唔通馮專員想「更上一層樓」？馮煒光係武漢華中師範大學歷史文化學院博士研究生，佢噚日就引咗BBC（英國廣播公司）幾段片，嚟引證自己說法。


環境局政治助理歐詠芷早前喺facebook留言，批評傳媒有關洋垃圾報道「偏頗」，搞到局方要澄清佢嘅留言唔代表局方立場；馮煒光被問到怕唔怕再陷入類似風波時話，「我條line都無離開政府條line」，強調真係「我手寫我心」！