經民聯茶敘石禮謙窒自己友

【明報專訊】經民聯噚日同記者茶敘，7名立法會議員到齊，仲坐足全程，雖然作為黨友應該同聲同氣，但噚日就有唔少火花，唔知係咪黨友兼行會成員林健鋒同政府建議樓市辣招點改善，石禮謙唔多高興，茶敘期間不時啄住林健鋒。前日石禮謙公開形容林健鋒同民建聯李慧琼「起雙飛」，石禮謙噚日更加不停叫林健鋒做「飛哥」，好搞笑。


不停叫林健鋒「飛哥」

雖然茶敘原本應該好輕鬆，但大家都好關注經民聯喺印花稅上嘅投票意向，石禮謙亦不斷批評政府做法有問題，形容政府喺呢件事上好似「人大釋法」咁，講幾句就令《基本法》賦予本港居民買樓嘅權利無咗（即係要畀多啲稅）。當佢講完後，又突然叫林健鋒以行會成員身分表態，搞到對方好尷尬。


鄉議局主席劉皇發有嚟茶敘，經民聯成員亦向發叔賣口乖，主席梁君彥話如果發叔組黨，佢哋一定全部加入；林健鋒又話發叔成日同佢哋一齊玩，個心都連埋一齊。對組黨無乜表態嘅發叔就用馬名「你知我心」回敬佢哋。