郭醫生拍片講前列腺癌

【明報專訊】繼前排拆解「印度神油」可唔可以壯陽之謎後，本身係泌尿科專科醫生郭家麒再下一城，噚日放咗條片上YouTube（www.youtube.com/embed/ECjM8e7251Q），今次亦離唔開佢嘅專長泌尿科。話說主角因為患上前列腺癌差啲搞到要跳樓，後來遇上郭醫生，教大家如何正確醫前列腺癌。


近年坊間湧現唔同聲稱治療「頑症剋星」嘅成藥，番茄紅素更被人講到神奇到咩病都醫到。不過，浸會大學化學系講師麥嘉慧喺短片話，其實醫學界到目前都未真正搵到前列腺癌成因，所以未有真正預防方法。佢又話，雖然近10多年有科學研究令人相信番茄紅素或可以預防前列腺癌，但結果仍需時間同數據證實。


郭家麒就話，醫前列腺癌唔係靠食品，而係可靠手術或電療治療，病情後期亦可靠荷爾蒙將病情拖慢減輕。佢又話，目前無專門法例規管市面上各類膳食補充劑、營養補充劑、天然健康食品等，所以市民選購時都係小心啲，最好當然先問醫生意見，講到尾，健康飲食作息先係保持健康嘅不二法門。