警隨時無榮休金牌

【明報專訊】警隊內部一向有警察福利基金，用嚟幫助有需要嘅警員同家屬，但Emily聽聞呢個一向靠外界捐助嘅基金近幾年少咗收入，令到下年向退休警員發放嘅榮休金牌都可能要取消喎。


馬會足總減幫襯

警察福利基金以往有超過1億儲備，但家得番七八千萬，原因係警方近年收緊咗接受捐助嘅審核標準，避免收到「政治捐獻」；而以往馬會喺賽馬日同押解款項，同埋足總搞球賽，都會請警員幫手做保安工作，佢哋會計番人工畀警隊，啲錢都會撥入呢個福利基金，但家佢哋都請晒保安公司，基金變相少咗收入。


金價升 金牌7000蚊個

Emily聽聞警隊唔多想影響向警員發放嘅經濟援助，所以就考慮取消有退休同事名字同服務年期嘅榮休金牌，但一切都要睇埋下年財政狀况先決定。近來金價上升都係一個原因，以往三四千蚊一個金牌，家成七千幾蚊一個，每年成千個警員退休，條數都幾襟計。


有警察朋友同Emily講，警隊頒金牌畀退休同事都算係一種認同，無咗都會影響士氣。警方發言人只係話，警察福利基金每年收入同支出都會經審計署批核後向立法會提交報告。