鄉局擲100萬設研究部

【明報專訊】近日不斷話要組黨、為選舉做準備嘅鄉議局，嚟緊下星期五28號會去深圳舉行集思會，主席劉皇發話，早前已經完成拜訪27鄉事委員會同鄉民座談嘅工作，嚟緊呢個兩日一夜嘅集思會將會研究鄉議局選舉工作。不過佢又同記者講，個人從來無講過要組黨，只不過鄉議局需要做研究，睇吓日後選舉安排點做。


發叔妹夫主理

雖然發叔話唔係組黨，但係鄉議局亦有唔少動作，噚日召開執委會，就通過撥100萬元去成立研究部，發叔話呢個只係前期工作，筆錢用嚟請人，而負責處理研究部嘅，就係發叔妹夫薛浩然，稍後提交研究部運作建議。呢100萬元鄉議局唔會特別開獨立戶口處理，但會由佢哋內部委員會共同監督。


荃灣鄉委會主席鍾偉平話，100萬對於成立研究部只係好少錢，目標係要成立研究中心，研究有關新界各項議題，唔限於政治問題，好似堆填區等都一樣關事。