高永文梁栢賢渣馬拖手衝線

【明報專訊】渣打馬拉松分開唔同組別嘅比賽，全長兩公里嘅「領袖盃」，噚日人才濟濟，由灣仔運動場跑到維園。呢排忙住處理活雞問題嘅食物及衛生局長高永文都有跑，最大目標係「跑得完，全程都要跑，好慢都唔緊要」，最終同醫管局行政總裁梁栢賢兩個男人手拖手衝線，好溫馨呀。


高局長話平日少跑步，過去一個月畀心機練跑3至4次。佢笑笑口同Emily講，家年紀大，好少玩球類活動，平時鍾意行路當做運動，例如間中會去米埔觀鳥。


負傷徐立之 鏡頭前幫手跑

另一跑手港大校長徐立之跑完之後汗流浹背，Emily仲以為佢拚盡狂奔，原來佢「傷膝」，只能步行，但補充話有主辦單位人士叫佢「喺鏡頭前跑兩步當宣傳吓」，於是佢都喺鏡頭前輕輕跑吓幫忙。徐校長話如果下年喺香港，會考慮參加10公里賽