新民黨公民力量 食湯圓結盟

【明報專訊】噚日係情人節兼元宵，新民黨喺呢一日同傳媒聚會，早幾日同該黨結盟嘅公民力量拉大隊出席，至少10名區議員到場，新任新民黨副主席潘國山話噚日係佢哋兩黨「聯婚」後首次聚會，仲向主席葉劉淑儀送上「同心結」，寓意兩黨永結同心，不過中間亦要有空間咁話。


葉劉獲贈同心結

或者要襯番情人節，雙方結盟後表現都好甜蜜，噚日加插特備節目，預備湯丸加埋蜜糖，希望甜甜蜜蜜，由兩個組織嘅區議員互相餵食，新民黨東區區議員謝子祺，就同公民力量區議員陳敏娟互餵湯圓。有啲區議員即場聲明自己已婚，可能唔想自己嘅另一半誤會啩。


新民黨地區勢力大增，但葉太就話自己唔會轉戰「超級區議會」，因為目前各項工作已經令佢好忙。


至於近日新民黨副主席田北辰頻頻出現新東，田二少否認下屆選舉會轉區參選，相信都係由新界西或者「超級區議會」兩條路出選。