廉署牛一送影碟

【明報專訊】廉政公署噚日40歲生日，搞咗個慶祝酒會，政商界人士出席道賀，現場雖然唔見前專員湯顯明最愛嘅國酒茅台、魚蛋牛腩等招待來賓，但就送上兩隻有40周年官方標誌嘅DVD（圖）做紀念。Emily 八卦所知，原來新華社旗下嘅「新華電視」，早前拍咗一套四集嘅紀錄片，回顧廉署40年，話要「再現經典大案偵破過程，澄清歷史，還原真象」。不單有一眾廉署新舊人員現身說法，連勞福局長張建宗都粉墨登場。


「再現大案偵破 還原真象」

據Emily所知，新華電視早喺湯顯明醜聞被揭發前、即2012年底已經主動聯絡廉署，希望拍攝40周年特輯。廉署發言人話，署方覺得特輯有意義，喺資源許可下安排人員接受訪問。


對於財經網站指新華電視因此紀錄片「料獲得收益」，包括內地電視服務供應商達成廣播協議，發言人就話，呢啲係對方嘅商業決定，同廉署無關。


30周年有特刊 今年無

至於30周年時廉署有自行製作紀念特刊，40周年就無製作，反而係「真金白銀」買咗呢套DVD返嚟做紀念品送畀嘉賓，套碟要畀幾十元，唔涉及收受餽贈，特輯會由噚日起喺新華電視台播放，有粵語、普通話同英語3個版本。