元秋話老公唔浪漫 無期望

【明報專訊】情人節適逢元宵，最啱同情人過，不過立法會議員就唔係好好彩，因為今日要繼續辯論《施政報告》。公民黨陳家洛笑笑口話，要開立法會，無辦法下只可同老婆食情人節早餐，星期六如果得閒會補番數。自由黨鍾國斌話，自己家逢初一、十五食齋，唔知老婆肯唔肯跟佢喎！


陳家洛：食情人節早餐

民政事務局政治助理徐英偉透露，已經買花畀老婆，仲撇甩咗兩個仔同老婆食飯，不過由於太遲訂枱，訂唔到正日，噚日已經食咗飯。民建聯副主席蔣麗芸（政壇元秋）就話，老公真係唔識romantic（浪漫），對佢無乜期望，又話從來想買嘢就自己去買，因為咁先係獨立女性。


另外，立法會噚日第二日辯論施政報告致謝議案，民協馮檢基批評特首梁振英部分房屋政策「講咗當做咗」，例如公屋重建只係重建華富邨。工聯會榮譽會長陳婉嫻講到大嶼山計劃時，反問「是否有經濟效益的地方才是靚？」運輸及房屋局長張炳良話，房屋問題「複雜同嚴重」，形容手上無魔術棒，解決深層次問題要冷靜，按部就班，不能一蹴而就。