一哥自喻耆英 公公婆婆笑晒

【明報專訊】少年警訊大家聽得多，警務處最近搞咗個「耆樂警訊」，旨在向長者宣揚防罪、滅罪、家居同道路安全信息，已經有2300個會員。耆樂警訊噚日舉辦咗開展禮暨同樂日，處長曾偉雄致辭時話，任何年屆55歲嘅都可以參加耆樂警訊，仲話自己都夠資格，得台下公公婆婆好開心。


長者爭合照 擲豆袋五射三中

「一哥」平日唔多受示威者歡迎，不過噚日去到耆樂警訊同樂日，就有好多長者爭住同佢拜年合照，打成一片。一哥全副制服上陣，去咗玩長者搞嘅攤位遊戲，更一展身手玩擲豆袋，五射三中。耆樂警訊會員、72歲伯伯李家權講笑話，想幫警隊做秘密警察同24小時人肉天眼，睇吓邊度有罪案發生。


另外，警隊西九龍總區噚日公布，2013年度西九龍最佳保安服務選舉開始接受報名。西九龍總區防止罪案辦公室主任蘇秀慧話，最近喺九龍城區試行警衛先鋒計劃，加強同警衛合作，上個月喺畢架山有保安見到有口罩男形迹可疑，通知警方拉人，法庭判咗佢遊蕩罪成，緩刑兩年。