1粒星 + 4個冧巴＝電話號碼

【明報專訊】香港嘅電話冧巴有成8個字咁長，真係幾難記得住。外國有間叫One Smart Star（一星通）嘅公司睇準呢個市場機遇，舊年下半年向香港引入試推只需打「*」加4個冧巴嘅電話號碼 ，並響今個月正式推出服務。


雖然個服務仲係新新地，但不乏「大粒」捧場客，例如建行亞洲舊年推出稅貸優惠時，已經用咗母公司建行個股票代號，向佢地註冊「*0939」作為服務熱線。仲有幾間剛創業嘅call車公司，都用咗呢個服務，例如 GOGO Van號碼係「*1234」、Call4Van 係「*4567」，大家可能對間嘢唔係太熟悉，但睇一眼應該已經記得佢哋個聯絡電話啦﹗


一星通：通訊量平均增兩成

一星通香港銷售總監黃運英話，香港嘅電話號碼冗長得嚟又冇特別意思，如改用一星通號碼，就易記得多。公司內部統計顯示，用戶採用一星通服務後，通訊量平均增加咗至少20%。除咗4字冧巴，公司仲會為申請人紀錄所有客戶嘅來電號碼，方便佢哋做市場分析。


自選號碼最貴2.5萬

小琴聞說如果想向本地電訊商拎個「8888」之類嘅靚冧巴，要先畀10幾萬嘅一次過費用，之後仲要交月費。不過一星通個plan平得多，按客戶對冧巴組合嘅要求，月費3500至2.5萬蚊。12個月合約期後，想保留個冧巴要再續約，但每次續約時加價幅度唔會超過5%。如要埋客戶來電資料，月費多160蚊。黃運英話，至今已同50幾個客戶接洽緊，有藝員中介都希望幫佢哋公司旗下嘅明星申請4字電話號碼。


email: piano@mingpao.com

[小琴密語]