泛民飯盒會聯署 4月12封

【明報專訊】民協立法會議員兼泛民「飯盒會」召集人馮檢基噚日同記者茶敘，阿基同大家報告吓過去4個半月飯盒會「業績」﹕總共出咗12封聯署信，當中9封得到飯盒會內23名泛民議員支持，仲有3封得到建制派議員簽名。阿基話相信未來泛民同建制嘅合作空間有望提升。


飯盒會喺短短4個半月可以出到12封聯署聲明，可以話係「戰績彪炳」，阿基話證明泛民議政嘅敏感度進步咗，但亦同時反映社會事件多咗。佢仲話有3次聯署，包括電視發牌、堆填區同漁農基金，都係聯同建制派議員一齊聯署。被問到自由黨都曾經參與泛民聯署，佢哋係咪比較容易去傾偈嘅建制成員，阿基就話同自由黨喺多個議題同範圍都有偈傾，但就笑住話「不過都唔係好易去傾」。