周末狗狗領養嘉年華

【明報專訊】大家如果諗清諗楚想領養狗仔，又想知多啲領養服務嘅資訊，Emily推薦大家去嚟緊星期六同星期日（15及16日）喺荔枝角公園一期足球場舉行嘅「有你寵愛」狗狗領養嘉年華，當日大家仲有機會親身接觸待領養嘅狗仔。


活動由漁護署同4個動物組織合辦，希望鼓勵市民領養被遺棄或無人認領嘅狗狗，同推廣做個盡責寵物主人嘅信息。嘉年華節目包括嘉賓分享養寵物心得、狗狗領養服務查詢、警犬隊同檢疫偵緝犬隊表演等。仲會有狗狗遊樂場，大家可以帶同自己嘅寶貝去，不過，最重要係可以親身同待領養嘅狗狗見面啦。


狗狗領養嘉年華免費入場，開放時間為早上11點至下午6點。