人民日報文章指導遊讚好「內地客愈來愈文明」

【明報專訊】近年政治主旋律之一係中港兩地矛盾，中國官方媒體呢排嚴陣以待，繼早前新華社寫咗篇軟銷中央政府挺港措施嘅文章後，《人民日報》海外版噚日有篇報道，話唔少香港商家同導遊讚內地人嚟香港旅遊「變得愈來愈文明」，話佢哋學識入鄉隨俗，Emily想問大家認唔認同呢？

呢篇題為〈百萬人春節訪港 商家讚刮目相看 「香港地」融合「內地客」〉嘅報道，訪問咗旅遊界立法會議員姚思榮、香港導遊盧先生及胡女士、銅鑼灣時裝店負責人張小姐、尖沙嘴中式精品店黃先生等，佢哋話內地客喺港鐵鬥嘴、衝紅燈、大聲講嘢呢啲問題已經減少咗，亦開始自動自覺排隊。


話少咗喺港鐵鬥嘴 開始識排隊

報道又引用《大公報》嘅讀者來信，鬧一啲有鼓吹民粹嘅香港人用各種政治口號抹黑、污名化內地遊客，係嚴重扭曲嘅排名心態。


有趣嘅係，《人民日報》海外版喺冇透露來源情况下，引述咗《大公報》早前對教協會長馮偉華嘅電話訪問報道，講香港人同內地人已經開始互相適應。估唔到教協呢個民主派組織嘅頭號人物，都可以用呢種方式「現身」《人民日報》。