謝志峰台上獲派一打利市

【明報專訊】偶爾都會去《城巿論壇》關心吓社會事務、曾在早前特首梁振英落區時力撐政府的「愛港之聲」前成員彭春娥，噚日都有去賈炳達道公園嘅《城巿論壇》，聽吓有關中港矛盾議題嘅討論。雖然噚日已係年初十，彭春娥趁節目賣廣告休息時段，離奇地走上台，向節目主持謝志峰派利巿，仲要係12封一打咁多，Emily見謝志峰那刻都有啲畀佢嚇親。


愛港之聲前成員突上台

除咗派利市，彭春娥仲準備左一盒禮物送畀謝志峰，Emily見謝志峰當時同佢講聲多謝晒，仲封番利市回禮。節目後，Emily去問謝志峰，佢話收到利市個刻非常驚訝，好在自己係「老江湖」，隨身帶備一大堆利市回禮，於是回番12封利市，另加1封為禮物回禮。


港台規定 利市須退回或做慈善

港台係政府部門，對職員收禮有嚴格規定，謝志峰話佢係噚日節目期間共收到約15封利市，但未拆唔知有幾錢，不過全部都會上繳港台。港台方面話，所有員工工作期間收到現金例如利市，一係退回，一係就捐畀慈善機構，即係話呢12封利市，謝志峰一定唔會收，Emily心諗佢仲要自己掏荷包蝕埋回禮利市！