梁美芬派「風雨同路」遮

【明報專訊】新年係唔少議員落區嘅好機會，好似經民聯梁美芬過去幾日帶埋財神去到九龍西各區，大派金幣利市之餘，噚日不時落雨，佢仲趁機會向市民派印有「風雨同路」同佢所屬團體西九新動力嘅雨遮，因應西九區內唔少老人家，梁美芬設計嘅遮柄好似手杖形狀，方便長者使用。佢話噚日喺石硤尾辦事處外派遮時，一度有超過40名市民排隊。


大派金幣利市 狗仔都有份

而前日佢亦去到黃埔一帶同市民拜年，仲請埋歌手林慕德同佢落區演唱賀年歌《和氣生財》，又話巡遊期間遇到有人放狗，兩隻小狗見到梁美芬就立即去佢前面，好似同佢拜年咁，佢亦派埋利市畀兩隻狗。