裝修蝦碌 警方傳媒熱線突斷

【明報專訊】警察公共關係科有幾條傳媒熱線，相信唔少行家都可以倒背如流，事關不分晝夜發生嘅突發事故、牽涉警隊嘅所有內外事務等，都要靠熱線向警隊查詢。不過，呢幾條重要「橋樑」噚日突然斷線4句鐘，原來係公共關係科準備裝修擴充，搬去臨時辦公室，竟然發現電話公司未駁好電話系統，好彩佢哋臨急開咗兩條臨時手提電話熱線，令Emily同行家嘅攞料工作無受到嚴重影響。


事緣噚日晏晝，Emily嘅同事如常致電警察公共關係科傳媒熱線，打算追問一單朝早發生嘅名店失竊案資料，點知電話一直無法接通。其後知道公共關係科嘅電話系統故障，唯有轉打兩條臨時手提熱線查問，可能一時間有太多留言，等咗一段時間都未有回覆。


不過，警察公共關係科之後主動來電，同事追問電話故障嘅原因，原來係佢哋準備裝修擴充，搬去同一層嘅臨時辦公室後，發現未駁好電話系統，令傳媒熱線停止運作差唔多4句鐘。不過，佢哋話新辦公室兩個月後完工，到時可以加強部門同外界溝通，令大家工作更順利咁話。