港台周年團拜

【明報專訊】香港電台噚日舉行周年團拜，搭建咗大型騰飛金馬布景。近日港台多風波，新正頭，團拜司儀、《頭條新聞》節目主持之一羅啟新亦不忘輕鬆贈興，話估唔到港台團拜個布景「平平哋（成本低）都可以起到咁靚」，又賣花讚花香，話港台「人強馬壯」，只係「馬槽比較窄」，暫無解決辦法，叫大家「將就吓」，擺到明窒港台新大樓預算被否決。


亞視劉瀾昌：

評論節目未必要回應

唔少廣播界重量級人馬都有嚟湊熱鬧。比較少出現嘅有亞視高級副總裁劉瀾昌，點解Emily咁重視佢？皆因通訊事務管理局正檢討規管社論形式、個人意見節目，呢個檢討，正正因為亞視《ATV焦點》收到4.2萬個公眾投訴而引發。


通訊局只係視《ATV焦點》為「個人意見節目」，當時有唔少人投訴，批評亞視喺新聞前後播《焦點》。劉瀾昌就同Emily講，好難定義新聞時段，但唔能夠規定《焦點》唔准喺新聞後播出，但佢承認喺新聞中播就唔係咁好。


佢認為，一個評論節目係可以有自己立場嘅。但係咪應該可以畀番被批評者回應，令節目持平啲呢？劉瀾昌話呢啲都屬於「新問題」，可能要逐步完善，又話未必一定要咁規定，因為有渠道畀被批評者反映番意見。