教協快閃聲援許志永

【明報專訊】內地維權學者許志永因為爭取教育平權被指觸犯「聚眾擾亂公共場所秩序罪」被判監4年，香港教協嘅成員睇唔過眼，十幾個理事喺年三十晚，先後去咗支聯會年宵檔口、中聯辦門外，以及時代廣場、金紫荊、朗豪坊外等好多內地人聚集嘅地方，「快閃」舉起「公民要求釋放許志永」標語，並向途人派傳單，希望將呢個訴求傳達畀香港同埋內地人。


教協理事將呢啲快閃片段剪成短片，放上YouTube，當中加插咗一啲訪問片段，由幾個教協理事，包括黃克廉、張銳輝等，以及幾年前喺保良局李城璧中學老師安排下北上聽過許志永一席話嘅香港學生，講吓佢哋對許志永嘅打氣說話。


創作《志永》 上載YouTube

熱愛音樂嘅教協理事方景樂，仲同佢嘅band友一齊創作咗一首歌《志永》，作為條短片嘅背景歌曲，歌詞係咁嘅﹕「平明如鏡，是我理性，照出大地不平……我只在乎哭泣的土地，抬不起頭的百姓，可不可以多愛他們一點……」。呢段YouTube片叫《公民要求立即釋放許志永》，大家有興趣可以睇睇。