工聯會馬年一攻一守

【明報專訊】馬年伊始，政黨陸續同傳媒團拜，順便講吓新年願望，工聯會榮譽會長鄭耀棠、會長林淑儀、理事長吳秋北同立法會議員黃國健（KK）噚日就同大家講馬年大計，KK話佢哋主打一攻一守，攻，就當然係爭取取消強積金對冲機制；守，就要守住唔准大規模輸入外勞。


斥商界不爭取大業主減租

喺取消強積金對冲議題上，KK話會喺立法會逼政府交代立場，吳秋北話3月24號會搞大會，由勞工議員、勞顧會成員同各大工會舉行大會講有關議題，相信至少會有幾百人出席。4個勞工界代表不忘鬧吓商界，話商界成日話取消對冲會影響香港競爭力，咁係咪就要打工仔犧牲呢？KK話，商界最高成本係租金問題，但佢哋唔去爭取大業主減租，反而去「烚」打工仔，完全係唔公義嘅。


至於諮詢緊嘅標準工時問題，工聯會就話特首梁振英至少要喺任內研究立法條文，林淑儀就話40年前佢打工嗰陣都有加班補水，家反而大倒退。


粵辦同事24小時on call

不過，講得咁大聲話要爭取，但原來工聯會都未有帶頭實行標準工時，皆因佢哋喺廣東5個辦事處，同事都太落力喎，甚至將公司電話飛線去自己手機，若有港人遇事急call，即使半夜三更，佢哋同事都會立即處理，咁即係24小時on call啦。