徵文賽得獎空少幫伯伯剃鬍洗衫

【明報專訊】旅客喺飛機上遇到問題，好自然會求助機艙服務員，但唔係個個人都會做，眼利嘅國泰高級機艙服務事務長廖士堯（阿Sean），憑住敏銳觸覺，搵出需要幫助嘅「隱蔽乘客」，仲試過幫長者剃鬍、洗衫，甚至自費買紀念品送畀心情差嘅乘客，令到冷冰冰嘅機艙增添人情味。


「把我當孫兒」打動伯伯

廖士堯呢個多行一步嘅工作態度，令佢獲得香港顧客服務協會「優質顧客服務大獎2013」嘅「感動時刻」徵文比賽獎項。阿Sean獲獎嘅文章係〈高空中的好孫兒〉，內容講佢喺2008年一班往奧克蘭嘅航班，發現一個坐輪椅嘅伯伯唔好意思出聲要求協助去洗手間，但忍唔住喺座位解決，整污糟咗條褲。阿Sean留意到佢神色有異，細心一問得知原委，於是要求為伯伯洗褲，初時遭到拒絕，阿伯話阿Sean無必要為佢做咁多嘢，但阿Sean以一句「把我當作孫兒吧」打動咗伯伯，後來仲幫佢剃鬚、梳頭同洗面。


言談間伯伯透露，家人會嚟接機，但佢其實唔想久別重逢見到家人時蓬頭垢面。落機前伯伯淚流滿面感謝阿Sean幫忙，之後阿Sean見到伯伯家人揸車接佢，阿伯上車前向阿Sean揮手，令佢頓感安慰。


阿Sean入國泰18年未轉過工，有咩心得呢？佢就話「唔好當返工係苦差，當中總會找到樂趣，但大前提係鍾意份工」。