懲教提早3月谷渣馬

【明報專訊】仲有唔夠兩個星期，2014渣打香港馬拉松就開鑼，各紀律部隊精英盡出，懲教署今年派出130個職員參加，一半跑全馬，10名代表就角逐10公里「紀律部隊挑戰盃」。連續兩年拎第三嘅懲教署，為咗挑戰盃賽六連冠消防隊嘅冠軍寶座，今年快馬加鞭，舊年9月開始備戰，比前年提早3個月，噚日大年初四約20人仲由大欖涌水塘跑至屯門掃管笏，全長12公里，體驗泥路同引水道等路段。


有信心坐三望一 130人參加各賽事

助理懲教署長簡志強話，初步估計隊伍平均快過舊年6分鐘，有信心今年可「坐三望一」。至於消防嗰邊，聽講除咗挑戰盃嘅10個代表，另有5名消防參加全馬，至於有無信心衛冕盃賽達成七連霸，消防話已經「積極備戰、全力以赴」。2008年渣馬首設紀律部隊盃，每隊派10名代表跑10公里，計算成績最好嘅8名代表排名次。


另外，有懲教職員擔任義務領跑員，伙拍視障運動員攜手出賽。第四年做領跑員嘅二級懲教助理吳金耀，聯同61歲香港失明人健體會嘅黃耀棠，第二次拍檔出賽全馬，目標將成績推快10分鐘，喺4小時10分內完成。高級懲教主任梁帶偉就偕老婆同20歲細女梁雅昀，一家三口第三年跑渣馬。將來想成為陀槍師姐嘅雅昀，試過一年內藉跑步減咗10多公斤，所以咪話跑步減唔到肥呀。