大公報文章﹕道歉什麼

【明報專訊】教育局早前喺官方網頁撰文，話廣東話係「一種不是法定語言的中國方言」，被網民批評，雖然局方前日決定收番篇文章，又話「深表歉意」，但事件餘波未了。親建制《大公報》噚日發表署名文章??教育局「致歉」些什麼？??，批評局方唔應該致歉，又話局方上面嘅說法唔係全錯，「因為廣東話的確不是香港的法定語文」，是「方言」，批評有人「上綱上線」。


指局方講法非全錯

《大公報》關昭專欄噚日質疑有傳媒同政黨「動輒上綱上線、歪曲事實」，批評局方澄清「廣東話是中文」，就好似澄清「阿媽是女人」，令人「摸不着頭腦」。作者又問，點解教育局只是發表上面言論，就畀人話要取消廣東話、向內地普通話「大陸化」，質疑傳媒同政黨說法。


《大公報》專欄文章要求局方澄清「方言和語文」嘅區別，又重申香港嘅法定語文是中文，廣東話只係可以廣泛應用嘅方言。教育界議員葉建源認為，香港有言論自由，但政府講法必須認真同有法例根據，認為《大公報》文章捉唔到重點，就係廣東話究竟可唔可以叫做「非法定語言」。