慢咇議辦遭爆窗 提職員小心

【明報專訊】噚日清晨人民力量立法會議員陳志全（慢咇）位於將軍澳健明邨嘅辦事處被人刑事毁壞，窗戶被打爛，好彩無人受傷。慢咇話近日人力執委「快咇」譚得志都遇襲，所以好多人都會聯想係咪針對人力。佢話會叫職員小心，亦會考慮裝天眼，佢已就事件報警。


學校涉干預員工性向 明哥激氣

另外，同志組織「大愛同盟」今年第一年參與維園年宵，慢咇噚日聯同大愛同盟成員、歌手黃耀明（明哥）及何韻詩去咗攤位宣傳。3人一講起近日有基督教學校被指干預員工性傾向時就好鬼激氣。慢咇話已經去信立法會教育事務委員會，要求教育局官員回應事件，強調即使現時無法例保障同志，但政府都唔可以「蹺埋雙手」咩都唔做，要求當局在教育宣傳方面下工夫。


明哥就形容成件事「好暴力」、「體現唔到耶穌嘅愛」。佢話事件正正係一個案例，反映未有反歧視法例下，同志投訴無門，「只能夠畀佢炒」。明哥又話擔心呢種風氣會傳到其他行業，「唱片公司唔畀同志歌手唱兒歌」。佢強調「宗教唔應該帶頭宣揚恐懼」。何韻詩就話，學校應該教導小朋友「用更開明更開放嘅態度面對呢個世界」。