張文「敢言」揮春送記者

【明報專訊】支聯會常委張文光（張文）噚日下晝去咗支聯會維園年宵攤位寫揮春，仲寫咗一對「明辨是非 獨立敢言」揮春送畀《明報》記者。張文又巧遇兩個喺加大拿返港嘅港人，佢哋話睇咗明報20多年，同Emily講希望明報可以一直保持家嘅風格，唔好「染紅」。


張文一見到Emily就即席揮毫，勉勵員工要加油。啱啱一對移民多倫多多年嘅港人夫婦梁氏伉儷經過，張文同佢哋講起明報加拿大版抽專欄一事。梁太話返到香港先知道發生呢件事，佢仲拍住Emily膊頭話，即使換總編輯，都「希望（明報）保持以前嘅風格，一直都要咁好」。梁太話多年前明報多倫多版第一日發行，已經開始訂閱，絕對係忠實粉絲。


嗌咪為六四館籌款

張文除咗寫揮春，仲落力嗌咪，為支聯會六四紀念館籌錢。張文強調呢間係全中國唯一嘅六四紀念館，希望大家多多支持。