鍾樹根參加佔領中環？

【明報專訊】建制派一向大力炮轟「佔領中環」唔合法，話會破壞香港營商環境云云，不過向來有火嘅民建聯立法會議員鍾樹根，噚日就公然喺facebook話自己「佔領中環——own the city」，佢哋當然唔係去中環靜坐，其實係樹根、黨友陳克勤同埋獨立議員馬逢國，一齊參加喺中環遮打道行人專用區搞嘅三人小型足球賽。


克勤仔喺facebook話，佢自己作為立法會足球隊召集人，當然要支持香港小型足球總會有份搞嘅呢個活動，一齊推動足球發展，佢又話現場好熱鬧，包括邀請咗啲明星一齊參與。


去遮打道三人足球賽

不過呢，鍾樹根就著咗西褲去，馬逢國雖然著牛仔褲同波鞋，但睇怕呢啲裝束，都唔係好適合落場踢波。原來佢哋3個議員只係做主禮嘉賓，輕輕咁主持開球禮咋！